जाणीव

 माझ्यासोबत रहा.. माझ्यासोबत थांब...

तुझा हात हातात घ्यायचा आहे कायमसाठी...

पूर्वी एकदा पकडला होता तुझा हात, पण तो गरज म्हणून, मदतीसाठी...

खूप दुर्बल होते, अगतिक होते; तेव्हा हक्काने तुला हाक मारली आधारासाठी

आणि तूही मोकळेपणाने आलास मला सावरायला..

 नंतर त्याच हक्काने तू दूर झालास आणि मीही जाऊ दिले तुला

आत्मनिर्भर होण्यासाठी; स्वत:ला ओळखण्यासाठी..

एकटीच लढत राहिले, ढासळलेले दुवे सांधत राहिले.

आता समर्थ झाले आहे स्वत:बद्दलच्या नव्या जाणीवेने..

नव्यानंच सुरु करते आहे पुन्हा जगायला आत्मसन्मानासहित..

या सशक्त जाणीवेनं तुझा हात हातात घ्यायचा आहे

निखळ सोबतीसाठी, कुठल्याही अपेक्षेविना..प्रगाढ विश्वासानं..!!